Министерот за надворешни работи на Република Северна Македонија, Бујар Османи учествуваше на виртуелниот министерски состанок на Алијансата за мултилатерализмот-во организација на Министерот за Европа и надворешни работи на Франција, Жан-Ив Ле Дријан и Федералниот министер за надворешни работи на СР Германија, Хајко Маас, на маргините на 75-то Генерално собрание на Обединетите нации.  „Како 30-та земја-членка на НАТО и земја во пресрет на формално отпочнување на преговорите за пристапување во ЕУ до крајот на годината, Северна Македонија со нова посветеност и решителност ќе продолжи со своите заложби за промоција на безбедноста, стабилноста и одржливиот развој, глобално и регионално, заедно со своите сојузници и партнери“, подвлече Министерот Османи, реафирмирајќи ја посветеноста на земјата кон мултилатералната соработка, како еден од клучните приоритетите на надворешната политика на Северна Македонија.   На министерскиот состанок, посветен на зајакнувањето на мултилатерализмот, беше изразена силна поддршка на меѓународната соработка, меѓународниот правен поредок и меѓународните институции во функција на заедничко и координирано надминување на глобалните предизвици, со посебен фокус на  пандемијата. Исто така беа разгледани повеќе иницијативи во однос на меѓународната соработка во сегментот на здравството, климатските промени, сајбер-безбедноста и родовите аспекти.   Инаку, Северна Македонија пристапи кон Алијансата за мултилатерализам во 2019. 

Министерот за надворешни работи, Бујар Османи, денес оствари видео средба со федералниот министер за европски и меѓународни работи на Австрија, Александар Шаленберг.  Во таа прилика,  Шаленберг му упати честитки за изборот на Османи и му посака многу успех во вршењето на новата должност. „За нас, интересот на Австрија, како непосреден сосед на регионот на Западниот Балкан е од исклучително значење, а особено клучната улога која ја одигра Вашата земја за време на австриското претседавање со ЕУ, период кога земјава оствари сериозен исчекор во европските интеграции. И во оваа фаза од интеграцијата, сме благодарни за принципиелните ставови што ги имате за европската перспектива на земјата“, истакна Османи, потенцирајќи на очекуваната поддршка од страна на Австрија за европските перспективи на Република Северна Македонија и во периодот кој претстои, особено во контекст на европската динамиката во процесот на проширување за време на германското претседателство. „Нашите очекувања од Германското претседателство се високи, и Владата активно работи на финализација на преговарачката структура, како клучна подготовка за квалитетен старт на преговорите оваа година“, потенцираше Османи За двајцата министри продолжувањето на политиката на проширување на ЕУ ќе биде позитивен сигнал за целиот Регион и неговата европска перспектива, воедно ќе се креира атмосфера за продлабочување на пријателските односи со соседите и интензивирање на регионалната соработка. Османи го запозна Шаленберг и за очекувањата од амбициозната Агенда на престојниот „Софиски Самит“ во рамки на Берлинскиот процес, преку кои регионот ќе добие значајни и конкретни придобивки: Економската инвестициската програма за Западен Балкан на ЕК, новата генерација на Регионалниот заеднички пазар како и иницијативата за постигнување на Регионален договор за слободно патување со лични карти. Соговорниците разменија мислења за миграциските прашања како и економската соработка и огромниот потенцијал за нејзино натамошно продалбочување.

  Министерот за надворешни работи на Република Северна Македонија, Бујар Османи, учествуваше на редовниот министерски состанок на земјите членки на Централно Европската Иницијатива (ЦЕИ), посветен на изнаоѓање начини за  поуспешно прилагодување кон новата нормалност во сегашниот и пост-КОВИД-19 период. „Пандемијата покажа колку сме како земји ранливи соочени со предизвиците на КОВИД19, особен ние, земјите од Југоисточна Европа, но во исто време, Пандемијата покажа дека имаме и волја, и капацитет за европски пристап во справувањето со овие предизвици, преку ефикасна меѓусебна соработка, како и соработка со институциите на Европската Унија.“, истакна Османи, посочувајќи притоа на регионалните предизвиците кои следат: овозможување на слободно патување на граѓаните и непречено одвивање на транспортот; зајакнување на трговијата и отворање на туристичките капацитети како сегмент на економската соработка; па се до размена на информации и најдобри практики во рамките на здравствените протоколи, и епидемиолошките сознанија. „Како нова Влада, како највисок приоритет на нашата надворешна политика ги поставивме добрососедските односи, со особен акцент кон интензивирање и поддршка на регионалната соработка, што соодветствува со темата и на актуелниов форум.“ истакна Османи, потенцирајќи притоа дека регионалната соработка треба да се гледа низ призма на и во насока на поддршка на политиката на проширување на Европската Унија кон земјите од западниот Балкан, за што изрази надеж дека ќе остане приоритет на Унијата и во претстојниот период. Во своите обраќања, Министрите потенцираа дека главен приоритет во справувањето со пандемијата останува здравјето на граѓаните и минимизирање на последиците врз здравствените системи, но истовремено беше потенцирано дека рестартирање на економијата и адресирање на социјалните импликации од економскиот пад, стануваат клучни предизвици за воспоставување на новата нормалност. Министерската видео конференција е дел од редовните годишни состаноци организирани од страна на претседавачите со иницијативата. Покрај министрите за надворешни работи од 18-те земји членки на Иницијативата, на Конференцијата учествуваа и други високи претставници на Европската банка за обнова и развој, Светската здравствена организација, Советот на Европа, ОБСЕ, Регионалниот совет за соработка како и Комесарот за соседство и проширување на ЕУ, Оливер Вархеји.