АМБАСАДОРОТ НА РЕПУБЛИКА БУГАРИЈА ВО РЕПУБЛИКА МАКЕДОНИЈА ГИ ПРЕДАДЕ КОПИИТЕ ОД АКРЕДИТИВНИТЕ ПИСМА
Скопје, 29 Јули 2010 година

Министерот за надворешни работи на Република Македонија, Антонио Милошоски, денеска го прими новоименуваниот амбасадор на Република Бугарија во Република Македонија, Раковски Симеон Лашев, кој ги предаде копиите од акредитивните писма за неговото именување.

Амбасадорот Лашев, заблагодарувајќи се за топлиот прием, го поздрави позитивниот и успешен развој на односите меѓу двете соседни и пријателски држави и искажа подготвеност да придонесе за натамошно продлабочување на соработката во областите од заеднички интерес, особено во инфраструктурата, енергетското поврзување, културната соработка, како и за унапредување на економската соработка.

Министерот Милошоски ги потврди европските и евроатлантски приоритети на нашата држава, нагласувајќи дека Владата на Република Македонија  останува посветена на својот реформски курс во правец на исполнување на сите критериуми за членство во ЕУ и НАТО, при што и натаму смета на конзистентната поддршка од Република Бугарија.