СРЕДБА НА МНР МИЛОШОСКИ СО Г-ЃА ДЕИРДРЕ БОЈД, РЕЗИДЕНТЕН КООРДИНАТОР НА ОБЕДИНЕТИТЕ НАЦИИ ВО РМ
Скопје, 3 Фебруари 2010 година

Министерот за надворешни работи на Република Македонија, Антонио Милошоски, на 2 февруари оствари средба со новиот Резидентен координатор на Обединетите нации во РМ, г-ѓа Деирдре Бојд.

Министерот Милошоски ја поздрави досегашната добра соработка на Република Македонија со специјализираните агенции и фондови на Обединетите нации кои се активни во Република Македонија. Изрази надеж дека искуството на г-ѓата Бојд во системот на ОН ќе придонесе за натамошно интензивирање на соработката. 
 
Шефот на македонската дипломатија ја запозна г-ѓа Бојд со приоритетите на Владата на РМ на планот на внатрешната и надворешната политика, а посебно се осврна на дел од досегашните и претстојни заеднички активности на ОН и РМ, како заокружувањето на Акциониот план за програмата на УНДП за РМ 2010-2015 година и Акцискиот план за програмска соработка помеѓу РМ и УНИЦЕФ 2010-2015 година.

Новиот постојан координатор на ОН во Република Македонија, Деирдре Бојд, изрази задоволство од досегашниот тек на соработката со македонските институции и изрази интерес за натамошно продлабочување на меѓусебните односи во повеќе области како децентрализација, социјалната кохезија итн.