РЕПУБЛИКА МАКЕДОНИЈА И НАТО

Членството на Република Македонија во НАТО останува стратегиски приоритет на надворешна политика на нашата земја. Интеграцијата во Евро-атлантските структури е наша аспирација, но и логична последица на постигнатиот напредок, во кој земјата инвестираше повеќе од една деценија.

Република Македонија својата определба за интеграција во Евро-атлантските структури ја дефинираше уште во 1993 година, кога Собранието на Република Македонија едногласно ја усвои Резолуцијата  за пристапување на Република Македонија во НАТО и истата повторно ја потврди во 2007 година.

Како долгогодишен партнер, Република Македонија се докажа како достоен сојузник на Алијансата, подготвена да ги промовира заедничките демократски вредности и одговорности. Република Македонија останува на определбата за учество во активностите на меѓународната заедница со цел справување со заканите и предизвиците по меѓународниот и регионалниот мир и безбедност.

Во финалната Декларација од Самитот на НАТО во Букурешт (2-4 април 2008 г), јасно беше призната посветеноста на Република Македонија кон вредностите и оперативните активности на НАТО и напредокот на земјата во севкупните реформски процеси. Сепак поканата за Република Македонија за полноправно членство во НАТО изостана, со образложение дека ќе биде испратена веднаш штом ќе се изнајде заедничко прифатливо решение за спорот околу името.

Република Македонија во целост ги реализираше плановите и активностите предвидени во 10-от циклус на Акциониот план за членство. Во тек е реализација на 11-от циклус на Акциониот план за членство и имплементација на задачите презентирани во Годишната национална програма на Република Македонија за членство во НАТО за 2009 – 2010 година.

За Република Македонија и по Самитот на НАТО во Букурешт, процесот на интегрирање во НАТО и ЕУ нема алтернатива. Интеграцијата во семејството на слободни демократии не е прашање на избор за Република Македонија, ниту пак наметната обврска, тоа е прашање на природна фузија на целите и вредностите на кои земјата е целосно посветена.